RUS
Сауда және интеграция министрлігі баспасөз қызметінің мәліметінше, Бейжіңде вице-премьер Серік Жұманғарин мен «Beijing Huanju Commercial Management Co.» (Wanda Group-тың еншілес компаниясы) бас директоры Дин И Қазақстандағы ірі нысандардың құрылысына инвестиция салу мүмкіндіктерін талқылаған.
Қытайлық компания Астанада бес жұлдызды қонақүй, коммерциялық кешендер, автотұрақтар және басқа да ірі нысандар құрылысына инвестиция салғысы келеді.
«Астанадағы жобаларыңыз басқа құрылыс компанияларына үлгі болуы керек. Бұл тұрғын үй кешені, мектеп, балабақша, демалыс аймағы, сауда орталығы, автотұрақ, кинотеатр және басқа да нысандарды қамтитын адамға қолайлы экожүйе болады деп ойлаймын. Астана – Қазақстандағы ең қарқынды дамып келе жатқан қала. Мұндағы жылжымайтын мүлік тиісті талаптарға сай болуы керек», — деді Серік Жұманғарин.
Сауда және интеграция министрі жоғары деңгейде қарастыру үшін ұсынылған жобалар эскиздерін қазақстандық тарапқа беруді ұсынды. Оған қоса министр Қазақстанның ірі қалаларында заманауи сауда ойын-сауық орталықтарының құрылысын қарастыруды ұсынды.
«Қазақстанның ірі қалаларында осындай инфрақұрылым жетіспейді. Бүгінде Қонаев қаласының бас жоспары қабылданды, батыста Ақтөбеде халық саны 600 мың адамға жетті, оңтүстікте – Шымкент, Қызылорда жақсы қарқынмен дамып келе жатыр, солтүстікте – Қостанай, шығыста – Өскемен, онда 1 млн-нан астам адам тұрады. Сауда-саттық саласындағы инвестициялардан бастауды ұсынамын. Егер қызық болса, Қазақстанның басқа қалаларында девелоперлік жобалар ұсына аламыз», — деп түйіндеді вице-премьер.
Айта кетсек, «Wanda Group» – әлемдегі ең ірі 500 корпорация қатарына кіретін қытайлық көпұлтты конгломерат компаниясы. Ол жылжымайтын мүлікпен жасалатын операциялар, инвестициялар, ойын-сауық индустриясы, денсаулық сақтау және жоғары технологияларға маманданған. Қазіргі уақытта компанияның әлемнің 180 қаласында 286 қонақүйі бар.