RUS
SMARTNEWS.KZ басылымының хабарлауынша, Мағжан есімді жігіт Бинұрдың талып қалғанын пайдаланып, оны зорлап кеткен. Ары тапталған қыз ұятты алдыға қойып, құқық қорғау органдарына жүгінбей, сол жігітпен отбасылы болуды ойлаған. Жігіт қызды алдап-соғып, миллиондап несие алғызған көрінеді. Мұндай сынақты көтере алмаған Бинұр өзіне жеті рет қол салмақ болған екен.
Бинұр Жұмағалиева Әл-Фараби атындағы Қазақ ұлттық университетінің “қазақ тілі мен әдебиеті” пәнінің мұғалімі мамандығында 3-курс оқитын. Ол кафеге даяшы боп жұмысқа кіріпті. Сол кезде Мағжан деген әріптесімен танысқан.
Айта кететін жайт, қыздың неврологиялық ауруы бар екен. Оған нейроциркуляторлы дистония, яғни эпилепсия диагнозы қойылған. Соның кесірінен ол жиі талып қалады.
“Жұмысқа кіргеніме 1 апта болған еді. Мамырда жұмыстан кешкі 21:00-де шығып, құрбымды күтетін кезде Мағжан шығарып саламын деді. Екеуміз құрбымды Атакент маңындағы саябақта күтетін болдық. Сол кезде өзімді жайсыз сезініп, талып қалдым. Оянсам, киімім, яғни хиджабым шешулі болды, Мағжанның үстінде жатыр екем. Ол темекі шегіп отырды, соның иісіне тұншығып, астмам асқынып, судорог алдым. Ол досын, одан соң жедел жәрдемді шақырды”, – деді бойжеткен.
Алғашында жігіт құйтырқы әрекетін мойындамай, кейін шындығын айтыпты. Ол қыздан кешірім сұрап, “үйленеміз” деп уәде берген. Абыройынан айырылған қыздың осыған келісуден басқа амалы болмаған. Осылай екеуінің махаббат хикаясы басталып, олар қыз-жігіт болып жүре бастаған.
Айтуынша, жігіт түзу емес әрекеттерінің кесірінен жұмыстан шығып қалған. Осыдан кейін қызға қаржылық мәселелері көп екенін, қарызға белшесінен батқанын айтып, одан көмек сұрапты. Қыз аяушылықпен қарап, өз әкесінен өтініп, 800 мың теңге несие рәсімдеген. Жігіт несиені төлеп беруге уәде еткенімен, бірде-бір рет ақша төлемеді дейді. Онысымен қоймай, Мағжан оқу ақысын төлеу керек деп тағы 500 мың теңге сұрапты. Қыз оның 200 мыңын аударып, 300 мың теңгені қолма-қол берген көрінеді. Одан бөлек азды-көп ақша сұрауды әдетке айналдырған. Кейін оның құмар ойынға ақша тігетіні белгілі болды дейді қыз.
Алғашында үйленеміз деп уәде берген жігіт түрлі сылтаулармен некелесуді кейінге қалдыра берген. Бір күні 19 жастағы қыз жүкті екенін біледі. Осы кезде Мағжан оған түсік жасап, баланы алдыртуға көндірмек болады. Десе де денсаулығына байланысты 1,5 айлығында бала түсіп қалған.
Екеуінің арақатынасы қаңтарда тоқтаған. Қарызын қайтармай, намысын аяқ-асты еткен Мағжанның әрекетін Бинұр өз парақшасында айтып, көпке бөліскен. Осы үшін Мағжан оның үстінен “жала жабу” бойынша арыз жазған.
Амалы таусылған студент қыз Жетісай маңындағы Жылысу ауылына жігіттің үйіне барып, оның жақындарынан көмек сұрайды. Ол отбасы үйленуге көндіреді деп ойласа керек. Бірақ Мағжанның екі әпкесі қызды қуып жіберіпті.
“Осы кезде көліктің астына түскім келіп, көлікке қарай жүгірдім. Бірақ әпкелерінің бірі көріп, мені көлікке отырғызып жіберді. Мен өмірден түңіліп, бәрі бітті деп жүріп келе жатқан көліктен секірдім. нәтижесінде Сарыағаш травматологиялық пунктіне жарақаттармен түстім”, – дейді ол.
Жігіттің ата-анасы 3 миллион теңгені Мағжан алды дегенге сенбейді. Айтуларынша, олар бұл ақшаны бірге жұмсап, қыдыруға, пәтер жалдап тұруға жұмсаған. Олардың мұның бәрі жастықтың буымен болды деп ұлдарын қорғады.
“Осылай шығу арқылы басқа қыздарға сабақ болсын дедім. Басқа жан Мағжанға ұрынып қалмасын, тіпті Мағжан емес, осындай альфонс жігіттерге алданбасын деп айтқым келеді. Бізде көбі “ұят” деп айтпай қалады, ал қаскөй өзінің жазасыз қалатынын біліп, одан сайын құйтырқы әрекеттерін жалғастырады”, – деді Бинұр.