RUS
Қазіргі кезде елімізде тоқпен жүретін көліктердің сандық көрсеткіші 1%-ды да құрамайды. Аз десек те, жыл санап көрсеткіш өсіп келеді. Мысалы, 2022 жылы елде 812 ғана электрокөлік болса, 2023 жылдың 1 мамырында олардың саны бірден үш есеге өсіп, 2790 көлік санын құраған.
Елдегі электрокөліктердің 87,6% жеңіл көліктер құрап тұр. Ал жүк көліктері 10,3% болса, автобустар 2,1% жетеді.
Айта кетелік, электрокөліктермен қатынаудың жанармай құйылатын көлікке қарағанда тиімді тұстары көп. Мәселен, Астана халықаралық қаржы орталығының (АХҚО) салалық талдау департаментінің зерттеу есебіне сәйкес, электрокөліктің шығыны 3 есе арзанға түседі.
20 000 км жылдық шығын Toyota Camry XV70 үшін шамамен 381 300 теңгені құрайды. Одан бөлек оған төленетін салық, мотор майын ауыстыру секілді машақаты тағы бар. Ал электрокөлікті зарядтау 170 000 теңгені құраса, тіпті үйден зарядтағанның өзінде 55 000 теңгені ғана құрайды. Электрокөлік үшін бұдан басқа шығындар жоқ.
Электрокөліктің ең үлкен артықшылығы – жыл сайынғы салықтан босатылған. Көлік салығынан бөлек, кедендік баж бен утиль алымынан босатылады. Сондай-ақ Банктер де электромобильдерді сатып алуға жасыл автонесие бере бастаған. Мұндай тиімді жеңілдіктер азаматтарды жасыл көлікке көшуге ынталандырудың жолы деуге болады.
Одан бөлек, Астана халықаралық қаржы орталығы елдің тұрақты экономикалық өсуіне, оның ішінде орнықты инвестицияларды тартып, қолдаушы қаржы экожүйесін құру бөлігінде төмен көміртекті экономикаға көшу мәселелеріне жәрдемдеспек.
- Елімізде электромобильдердің қолжетімділігін арттыру үшін АХҚО Жасыл қаржы орталығы жасыл қаржы саласындағы қажетті құжаттар мен саясаттарды әзірлеу арқылы жасыл облигациялар шығаруда және кредиттер беруде қаржы ұйымдарын қолдау бойынша қызметтер көрсетеді. Елдегі жасыл облигациялар мен несиелердің 70%-ы Жасыл қаржы орталығының қолдауымен берілгенін ерекше атап өткіміз келеді, - дейді АХҚО салалық талдау департаментінің бас менеджері Айнұр Жақыпова.
