RUS
SMARTNEWS.KZ басылымының хабарлауынша, танымал ресейлік музыкалық продюсер және композитор Максим Фадеев жаңа әннің жақын арада шығатынын жариялады. Salta атты трек қаза тапқан қазақстандық Салтанат Нүкенованы еске алуға арналған. Бұл туралы ол Instagram парақшасында жария етті. Белгілі болғандай әннің премьерасы 31 мамырда болмақ.
Пост астында Салтанаттың ағасы Айтбек Амангелді мен Айнұр Нүкенова композитор Фадеевке алғыстарын білдірген.
Продюсер сонымен қатар кісі өлтіру оқиғасы туралы өз ойларымен бөлісті:
"Қазақстанда экс-министрдің өз әйелін өлтіргені туралы сұмдық жайтты оқыдым... Мен сот залынан видеоны да көрдім. Сотталушының сабырлы бет-жүзі, жәбірленушінің "өзі кінәлі" екенін айтып ақталуы, мені қатты таң қалдырды", - деп жазды ол.
Фадеев сонымен қатар Ресейдегі тұрмыстық зорлық-зомбылықтан болатын өлім-жітімнің жиілігіне алаңдаушылық білдіріп, "біздің елде ол әлі де декриминализацияланған", - деп қосты.
"Егер ер адам сізді бір рет тепсе, кем дегенде бір рет ұрса — бұл әрқашан солай болатынының, бұл ісі қайталанатынының белгісі екенін біліңіз. Оның ұруына рұқсат берген сайын, оның соққысы одан әрі күшейе түседі. Ақыр соңында, бұл сөзсіз кісі өлтіруге немесе ауыр жарақатқа әкеп соғады", - деп кеңес берді ол тұрмыстық зорлық-зомбылықтан зардап шегетін әйелдерге.
Продюсер балаларға қатысты зорлық зомбылықтың әсеріне де назар аударды:
"Бұл ойым балаларға да қатысты. Әйтпесе, зорлық-зомбылықты көрген баланың психикасы бұзылып, ол өз ата-анасының мінез-құлқын өзіне көшіреді", - деді ол.
Еске сала кетсек, азаматтық әйелі Салтанат Нүкенованы өлтіргені үшін сотталған экс-министр Қуандық Бишімбаевтың ісі бойынша процесті көрермендердің көпшілігі онлайн бақылап отырды. Ол 24 жылға бас бостандығынан айырылған болатын.