RUS
SMARTNEWS.KZ басылымының хабарлауынша, әлеуметтік желілер мен мессенджерлерде пайда болған жаңа парақшаларға Асайын Байхановтың фотосуреті қойылып, оның атынан қарамағындағыларға хат жазылып жатыр.
Павлодар облысының әкімі Асайын Байханов тек үш ресми парақшасы бар екенін хабарлады. Олар: Instagram желісінде – @asaiyn.baikhan, Facebook-те - Асайын Байхан және telegramда t.me/AsaiynBaikhan.
Аймақ басшысының айтуынша, кейінгі күндері өзінің және бірнеше мемлекеттік орган басшыларының атынан әлеуметтік желілерде парақшалар ашылып, қарамағындағы бірқатар қызметкерге және өзге де адамдарға хабарламалар жіберілген.
«Мен сіздерден телефон арқылы хат алмасуда және қоңырауларға жауап бергенде сақтық танытып, абай болуды сұраймын. Өкінішке орай, алаяқтық схемалар жетілдірілуде және кез келген адамның олардың арбауына түсіп қалуы әбден мүмкін. Менің атымнан менің фотосуретім бар нөмірден қоңырау немесе хабарлама алсаңыз, алайда, нөмір жасырылған болса, онда бұл – алаяқтар. Сіздерден аса сақ болуды және абай болуды сұраймын», - деп жазды өзінің дербес парақшаларында әкім.
Сондай-ақ ол WhatsApp және Telegram мессенджерлеріндегі барлық хабарламаларды өз нөмірінен, жасырмай жіберетінін атап өтті.