RUS
1969 жылы туған Мықтыбай О. есімді ер адам үй маңындағы вагон ішінде Өзбекстаннан келген жалдамалы қызметкерімен арақ ішіп отырған. Мықтыбайдың азаматтық некедегі әйелі дастархан жайған. Сөйтіп "отырыс" кезінде өзбек жігіті әйелге көбірек көңіл бөле бастаған. Тіпті әйелге қолын жүгіртіп, денесінен сипап өткен.
Өзбекстандықтың бұл әрекеті үй иесінің ашуын туғызып, одан тезірек үйіне қайтуын талап етеді. Екі ер адам сөзге келіп, мәселені шешу үшін сыртқа қарай шығып кетеді. Үйдің қожайыны асхана пышағын ала жүгіреді.
Көшедегі жанжал ашық қақтығысқа ұласып кетеді. Мықтыбай ер адамның мойнынан, одан кейін беті мен құлағынан екі рет пышақ сұғып алады. Жалдамалы жұмысшы ауыр жарақат салдарынан есін жоғалтып, жерге құлаған. Ер адам вагонға оралып, әйелімен бірге отырысты жалғастыра береді. Бірақ келесі күні жергілікті тұрғындар өзбек жұмысшысының мәйітін тауып алады.
Үй иесі Мықтыбай бірден күдікке ілінеді. Жауапкерге Қылмыстық кодекстің 99-бабының 1-бөлігі (Қасақана кісі өлтіру) бойынша қылмыстық іс қозғалды. Сот барысында талапкердің азаматтық некедегі әйелі ер адамдар арасында қызғаныштан жанжал шыққанын растады.
Түркістан облысының қылмыстық істер жөніндегі мамандандырылған ауданаралық соты сотталушыны кінәлі деп танып, 11 жыл мерзімге бас бостандығынан айырды. Үкім әлі заңды күшіне енген жоқ.