RUS
Бұл туралы «Севказэнерго» АҚ баспасөз қызметі мәлім етті.
«ОАЭК» компаниялар тобына қарайтын электрэнергетикалық инфрақұрылым нысандарында «Севказэнерго» АҚ, «Павлодарэнерго» АҚ, «Ақмола электр желісін тарату компаниясы» АҚ қызметкерлері тәулік бойы авариялық-қалпына келтіру жұмыстарын жүргізіп жатыр.
Көктемгі су тасқыны кезінде тек Солтүстік Қазақстан облысында ғана электр беру желілерінің 729 бағаны және екі қосалқы станцияға зақым келтірілді, 98 км электр желісін қалпына келтіру қажет.
Мамандардың айтуынша, келген шығын бұдан да көп болуы мүмкін, ол су кеткеннен кейін белгілі болмақ.
СҚО Шал ақын ауданында 10кВ желінің құрылысы аяқталып, іске қосылды. Нәтижесінде Кеңес, Жаңаталап және Жаңажол ауылдарының 200-ден астам тұрғыны тұрақты электр энергиясымен қамтамасыз етілді. Жаңадан желі салынып жатқан уақытта елді мекендерге электр қуаты дизельді генераторлардан берілді.
«Қызылжар Су» ЖШС уақытша сорғы станциясын электрмен жабдықтау үшін 60 қызметкер, 13 арнайы техника жұмылдырылды. 21 сәуірге қараған түні екінші сорғы станциясы электрмен жабдықталды.
Қызылжар ауданында Вознесенка, Надежка және Боголюбово елді мекендерінің тұрғындарын электр энергиясымен қамтамасыз ету үшін темірбетон тіректер орнатылды. Бүгінде ұзындығы 15,6 шақырым болатын «Леденово-Боголюбово» 10кВ жоғары вольтты желісі іске қосылды.
Су басқан аудандарды электрмен қамту үшін «Севказэнерго» АҚ қосымша 5 дизельді-генераторлық қондырғы сатып алды. Олар Новокаменка және Архангелка ауылдарында орнатылған.
Ал Ақмола облысында электр тарату желілерінің 212 бағаны мен бір қосалқы станция істен шықты. Сондай-ақ 39 км электр желісін қалпына келтіру қажет.