Атырауда компания ауласында тұрған автобус түгі қалмай жанып кетті

Атырау облыстық төтенше жағдайлар департаменті қоғаммен байланыс тобының ақпаратына қарағанда, өрт бүгін, 29 сәуірде болған. 

«Департаменттің диспетчерлік пультіне бүгін сағат 15:08-те Атырау қаласындағы З.Қабдолов көшесінде орналасқан мекеменің ауласында тұрған «Yutong» маркалы автобустың өртенгені хабарланды. Өрт сөндірушілер шақырту орнына жедел жетіп, жалынды санаулы минутта оқшаулады. Жалын сағат 15:20 толықтай сөндірілді», -деп хабарлады департаменттің қоғаммен байланыс тобы. 

Көлік өртін сөндіруге Атырау облыстық төтенше жағдайлар департаментінің 6 қызметкері мен мен 1 техникасы жұмылдырылды.

«Жыл басынан бері 34 көлік өрті тіркелді. Бұл өткен жылдың осы кезеңіндегі көрсеткіштен 6 дерекке көп. Осыған байланысты жүргізушілерден осындай оқиғаның алдын алу үшін өрт қауіпсіздігін қатаң сақтау сұралады», -деп мәлім етті департаменттің қоғаммен байланыс тобынан.