RUS
Белгіленген уақытта әскери бөлімнің жеке құрамы саптық алаңда сап түзеді.
Әскери бөлім оркестрінің әуенімен саптық алаңға Жауынгерлік Ту шығарылды және ҚР Мемлекеттік Гимні орындалды. Мемлекеттік Туды көтеру мәртебесіне оқу пунктінің үздік жас сарбазы қатардағы Р. Жаңабай ие болды. Ары қарай жас сарбаздар саптық алаңда Отан алдында Әскери Ант берді. Әскери ант мәтінінің аз ғана сөздерінің ішінде үлкен мағына жатыр. Ол – Отанға деген қасиетті борыш. Бұл туралы өздерінің құттықтау сөздерінде әскери бөлім командирінің міндетін уақытша атқарушы подполковник Е. Усаев, Азаматтық қорғаныс және әскери бөлімдер комитеті төрағасының орынбасары полковник А. Советов, Алматы облыстық ТЖД бастығының орынбасары полковник Б. Қалиев және Жамбыл ауданы әкімінің орынбасары А. Туматаев айтып өтті.
Іс-шара барысында жас жауынгерлер қарумен дефиле, ал кинологиялық есептоп қызметтік итпен жаттығулар көрсетті.
Әскери ант қабылдау рәсімі жеке құрамның саптық алаңда салтанатты маршпен жүріп өтуімен аяқталды. Осы сәттен бастап олар толыққанды Отан қорғаушылар болып есептеледі. Жас сарбаздар әскери дайындықтың бірінші кезеңін аяқтады, алдағы уақытта олар әскери қызметтің шеберлігі мен құтқару дайындықтарын меңгеріп, саптық және дене дайындығын жалғастыратын болады.
Ант қабылдап, нағыз құтқарушы жауынгерлер атанған жас сарбаздар алдағы уақытта республика көлеміндегі азаматтық қорғаныс саласындағы төтенше жағдайлардың салдарын жою және апат болған жерлерде құтқару жұмыстарын жүргізу бойынша түрлі міндеттерді орындайтын болады.