Мәулен Әшімбаев Құрылтай депутаттарын сайлауда дауыс берді
Құрылтай депутаттарын сайлау ел бойынша 10 мыңнан астам учаскеде өтіп жатыр.
SMARTNEWS.KZ басылымының хабарлауынша, Парламент Сенатының бұрынғы төрағасы Мәулен Әшімбаев Құрылтай депутаттарын сайлауға қатысып, дауыс берді.
Мәулен Әшімбаев Астанадағы Қазақстан Республикасының Ұлттық академиялық кітапханасында орналасқан сайлау учаскесіне барып, өз таңдауын жасады.
Бүгін Қазақстанда жаңа бір палаталы Парламент — Құрылтай депутаттарының сайлауы өтіп жатыр. Дауыс беру ел аумағындағы 10 423 сайлау учаскесінде ұйымдастырылған. Оның 79-ы Қазақстанның 61 шет мемлекеттегі дипломатиялық өкілдіктері жанында орналасқан.
Сайлау учаскелері сағат 07:00-де ашылып, дауыс беру 20:00-ге дейін жалғасады.
Орталық сайлау комиссиясының мәліметінше, сайлаушылар тізіміне 12 605 788 азамат енгізілген. Дауыс беруге 18 жасқа толған және сайлау құқығы бар қазақстандықтар қатыса алады.
Құрылтай депутаттығына жеті саяси партияның кандидаттар тізімі тіркелген. Жалпы 545 кандидат депутаттық мандат үшін бәсекеге түсіп жатыр. Ал жаңа Парламенттің құрамына 145 депутат кіреді.
Осылайша, бір депутаттық мандатқа орта есеппен төрт кандидаттан келеді.
Құрылтай депутаттарының өкілеттік мерзімі бес жылды құрайды.
Материал авторы
