RUS
SMARTNEWS.KZ басылымының хабарлауынша, Демеу финалға шыққаннан-ақ оның көшесіне жол салынып жатты деп желі қолданушылары жазды.
Елдос Сметов Олимпиада чемпионы атанған соң Тараз қаласының әкімдігі спортшы тұратын көшеге асфальт төсегені желіде қызу талқыланған болатын. Бүгін бұл тақырып мемге айналып, қайта жалғасты.
Бүгін грек-рим күресінің балуаны Демеу Жадыраев (77 кг) финалда күреседі. Бұл жаңалыққа ерекше қуанғандардың бірі – 2008 жылғы Бейжің Олимпиадасының күміс жүлдегері Нұрбақыт Теңізбаев. Қазір Алматы облысы, Кеген ауданының әкімі Теңізбаев Instagram-парақшасында алдымен Жадыраевтың күресіне анонс берді. Сосын Кеген ауданындағы Ереуіл ауылында асфальт төселіп жатқан видеоны жүктеді.
Әрине, асфальт пен Олимпиаданың байланысы жоқ. Дегенмен, Демеу финалға шыққан соң, мұны қалжың деп түсінгендер көп.
Айта кетейік, Демеу Жадыраев Жетісу облысы, Панфилов ауданына қарасты Үшарал ауылында туған. Бірақ қазір ол Алматы облысының намысын қорғайды.