RUS
SMARTNEWS.KZ басылымының хабарлауынша, әлеуметтік желіде интим гимнастикамен айналысып, қынапты тарылтатын жаттығу істеп жатқан әйелдердің видеосы сынға ұшырады. Осы мәселе төңірегінде Stan.kz тілшісі сала мамандары мен қоғамға танымал азаматтардың пікірін сұрап көрді.
Қоғамның қызу талқысына түскен даулы видео интим тренер, сертификатталған сексолог Қасымжанова Меруерттің кезекті оффлайн сабағынан үзінді екен. Бүгінде 20 мың қыз-келіншектің алғысын арқалап отырған маман, әйелдер денсаулығы мен гигиеналық мәселелеріне көңіл аудармаса, қатерлі ісіктің саны артады деп алаңдайды.
“Жалпы интим гимнастика өте кеңінен таралып жатыр. Өйткені бұл – әйелдердің жанайқайы. Осыған дейін ішімізде сақтап, кімнен кеңес сұрарымызды білмедік. Енді ғана дамып жатқан сала. Жыл өткен сайын әйел адамның терісі салбырап, бұлшық еттері босай бастайды. Ол әйелдің гинекологиялық жағына да әсер етеді. Қынап төмен түсіп кетеді. Зәр ұстай алмау, жиі жел жіберіп қою секілді сырқаттарға душар болады. Маған келетін әйелдер тек 4-5 бала туған емес, бала көтере алмаса да, қынабынан мәселесі бар қыз-келіншектер де бар. Бала көтермеген әйелдің төменгі жағы дұрыс деп ойлау қате. Қарапайым Кегель жаттығуын білмейтін қаншама әйел бар?! Кеңес заманында бұл тақырыпта сөйлесу ұят еді. Сол заманда бойжеткен қыз-келіншектердің де түсінігі басқа. Олар “ұят болады” деген шеңберге салып қояды. Мәскеуге оқуға барғанымда, ол жақтың кейбір әйелдерінің де таным-түсінігі осы деңгейде екенін байқадым. Менің ойымша, білмеу, ақпарат алмау – ұят”, – дейді интим тренер Меруерт Қасымжанова.
Сертификатталған маман интим гимнастикаға кәсіби тұрғыда анықтама беріп, тек төсек қатынасын ғана қарастырмайтынын айтты.
“Интим гимнастика дегеніміз тек төсек қатынасы емес. Ол – әйелдің денсаулығы. Жатыр – екінші жүрегіміз. Статистикаға сүйенсек, еліміз әйелдердегі қатерлі ісік дерті бойынша ондыққа кіреді. Бұл жақсы көрсеткіш емес. Міне, осы жағдайлардың алдын алу үшін әрбір әйел интим гимнастикамен айналысқаны дұрыс. Бізге сұраныс болғасын көбірек курс, сабақ өткіземіз. Ашық түрде қоғам болып талқылайтын тақырыптан ешкімнің қашпағаны жөн. Біз мәселені көріп тұрып, бір бұрышқа “ұят болады” деп жауып қоя алмаймыз. Мәселені тыққаннан ешқашан шешілмейді. Ауқымды түрде үлкен аудиторияға түсіндірген дұрыс”, – дейді интим тренер.