RUS
SMARTNEWS.KZ басылымының хабарлауынша, 31 қаңтарда 43 жастағы Әл-Бейне Зарипованың мәйіті үйдің жертөлесінен табылды.
Іс-материалдары бойынша, оның 15 жыл некеде болған күйеуі Сабыржан Зарипов оған 10 рет пышақ жарақатын салып өлтіріп, артынша телефонынан өз шотына 4 миллион 700 мың теңге аударып алған.
Қазір іс Қылмыстық кодекстің 99-бабы “Адам өлтіру” және 175-бабы “Ұрлық” бойынша қаралып жатыр.
Сот отырысында жәбірленуші тараптың адвокаты Айнұр Омарова 99-бап “Адам өлтіруді” 99-баптың 2-тармағы “Аса қатігездікпен қасақана түрде адам өлтіру” бойынша ауыстыруды талап етті. Сөзінше, марқұм өлер алдында қатты қиналып, тән жарақаты мен жан жарақатын сезінді және азапталды. Ол адам бетін тілімдеу аса қатігездік санатына жататынын айтады.
“Зарипов қылмысқа дайындалды. Әл-Бейненің ажырасқысы келгенін түсініп, мүлікті бөлмеу үшін осындай зұлымдыққа барды. Пышағын жертөлеге тығып, Әл-Бейнені сол жаққа апарып, оң қолмен жүзі 180 мм ас үй пышағын 10 рет сұқты. Сол жақ беті, кеудесі,мойны мен оң жақ жамбасы, трахеясын жаралады. Мұрнынан сол жағына дейін тілімдеп, аузын жыртып кеткен, 10 см жара қалдырды. Сүт безін 9,5 см жара салған, қолтық тұсындағы жарасы – 8 сантиметр, сол жақ кеуде тұсындағы жарасы 6 см, жамбас тұсына 10 см жара қалдырған. Мұның бәрі Әл-Бейнеге төзгісіз тән ауруын әкелді. Сол жақ гематорокс 3 литр, яғни аузынан 3 литр қан кетті. Осының бәрін саралай келе, аса қатігездікпен өлтірілгенін көруге болады”, – деді ол.
Алайда прокурор мұны қолдамады. Оның айтуынша, аса қатігездік деп танылуы үшін адамды бірнеше сағат азаптағаны, аштықпен не суықпен жазалағаны, не тірілей күйдіріп қинағаны дәлелденуі керек. Ал бірнеше пышақ жарақатын аса қатігездікке жатқызбады.Сол үшін сот адвокаттың талабын қанағаттандырған жоқ.