RUS
SMARTNEWS.KZ басылымының хабарлауынша, марқұмның анасы Лариса Салбаева ұлының жоғарыдан өздігінен құлап кетуі мүмкін емесін айтты. Себебі баласы мүлде ішпейді, шекпейді. Бұған дейін тек спортпен айналысқан. Қайғылы қазаға тап болған отбасы бұл істе Медетті дос балдары өлтірді ме деп күдіктенеді. Себебі үй қабырғасы мен еденде қан іздері болған. Марқұмның анасы Stan.kz тілшісіне қайғылы оқиғаның мән-жайын айтып берді.
Марқұмның анасы Лариса Салбаеваның сөзінше, баласы қайғылы оқиға болған күні достарыма барып, сол жерде қонамын деп айтып кеткен.
"Ұлым "достарыма барамын, бірге оқитын курстастарым, әр апта барып жүретін едім” деді. Желіде ұлымды "өзі ішті, құсамын деп өзін балконнан лақтырып жіберді” деген ақпарат тарап жатыр. Мен бұл әңгімелермен мүлдем келіспеймін. Өз балама сенемін. Өйткені ұлым ішпейтін, қаншама жылдан бері спортпен айналысып келе жатыр. Оқиға орнында баламнан бөлек төрт жігіт болған. Олар қылмысты 2-3 айдан бері ойластырған. Бұл мен үшін жұмбақ өлім. Төртеуі ұлыма арақты қинап ішкізген болуы мүмкін. Араққа бірдеңе қосқан да шығар. Сөйтіп олар менің баламды лақтырып жіберіп отыр", – дейді марқұмның анасы.
Фото: Видеодан скрин
Марқұмның анасының сөзінше, қайғылы оқиғадан соң бір бала қашып кетіп, мешітке түнеген.
"Төрт баланың біреуі кетіп қалыпты. Демалыста әпкемнің үйінде болдым дейді. Бір бала мешітке қашып, сол жерде түнеген. Ішкен адамды мешітке кіргізе ме? Біреуі баламды лақтырып жіберіп, қалған үш бала қарап отырады дегенге жеке басым сенбеймін. "Аңдаусызда болды, өзі ішті, өзі құлады" дейді. Олар баламның басын жарып, тіліп лақтырып жіберген. Себебі қабырғаның бәрі қан. Тіпті қан балконнан тамшылап, жерге түскен. Жоғарыдан төменге дейін қан болып жатыр. Бұл істе мен өз балама сенемін. Ол ішпейді, шекпейді. Кінәлі балалардың жазасын алғанын, соттың ашық түрде, әділ өткенін қалаймын", – дейді марқұмның анасы.
Фото: Видеодан скрин
TikTok әлеуметтік желісінде “ЗаМедет” деген арна пайда болды. Онда марқұмның туыстары, сыныптастары мен достары #ЗаМедет деген хэштегпен видеоүндеу жариялап, әділдік сұрап отыр. Олар марқұмның өз өзіне қол салғанына сенбейтінін айтып жатыр.
"Медет мас күйінде өзіне қол жұмсады, жоғары қабаттан өзі құлап түсті дегенге сенбейміз. Әділдікті талап етеміз", – дейді олар.
Айта кетейік, қайғылы оқиға елордада 13 қазанда болған. Осы оқиғадан кейін марқұмның анасы қостанайлық әйел 19 жастағы ұлын төрт бала қинап, тоғызыншы қабаттан лақтырып жібергенін мәлімдеген еді.