RUS
«Биыл жаһандық экономиканың дамуына геосаяси тұрақсыздық ықпал етіп жатыр. Бұл бірқатар әскери қақтығысқа, әлемдегі сауда-саттық пен инвестициялардың төмендеуіне байланысты. Халықаралық валюта қорының жаңартылған болжамыбойынша, әлемдік экономиканың өсуі 2024 және 2025 жылдары 3,2% болады. Орталық банктер өзінің қатаң монетарлық саясатын сақтағандықтан, жаһандық инфляциялық процестер баяу қалыптасып отыр. Дегенмен, қазір дамыған елдерде инфляция орталық банктердің нысаналы көрсеткішіне жақын. Бұл жетекші елдердегі орталық банктердің ақша-кредит саясатын біртіндеп жеңілдетуге жағдай жасайды», - деді Тимур Сүлейменов Мәжілістің жалпы отырысында.
Ұлттық банк төрағасының айтуынша, инфляция біртіндеп төмендеп келеді.
«Қазақстанды алсақ, қазіргі экономикалық жағдай – тұрақты, динамика – оң. Биылқаңтар-қыркүйек айларында жалпы ішкі өнім 4,0%-ке артты. Экономиканың барлық секторында өнім шығаруда өсім бар. Ең жоғары өсім ауыл шаруашылығында, құрылыс пен көлік саласында байқалып отыр. Инфляция біртіндеп төмендеп келеді. Қыркүйектің қорытындысы бойынша инфляция деңгейі 8,3% болды. Бұл 2023 жылғы ең жоғары көрсеткішпен салыстырғанда 2,5 есе төмен. Алайда, бұл көрсеткіш Ұлттық Банктің 5%-тік таргетінен әлі де алыс», - дейді ол.
Сондай-ақ, Т. Сүлейменов инфляцияның баяулау үрдісіндегі маңызды фактор – азық-түлік инфляциясының 5% болғанын айтты.