RUS
SMARTNEWS.KZ басылымының хабарлауынша, АҚШ-тың бұрынғы президенті Джо Байденге қуықасты безінің агрессивті рак түрі диагнозы қойылды. Бұл туралы The New York Times басылымы саясаткердің өкіліне сілтеме жасап хабарлады.
Дереккөз мәліметінше, ауру өткен аптадағы медициналық тексеріс кезінде анықталған. Байден зәр шығарудағы қиындықтарға шағымданған соң, дәрігерлер қуықасты безінен түйін (ісік) тапқан.
Анықталған ісік Глисон шкаласы бойынша бесінші топқа жатады — бұл қатерліліктің ең жоғары деңгейі саналады. Қауіптісі — ауру сүйек тініне метастаз беріп үлгерген.
Дегенмен, дәрігерлердің айтуынша, қатерлі ісік гормондық терапияға жақсы жауап беруі мүмкін, бұл болса тиімді емделуге үміт береді.
Қазір Джо Байден отбасы мүшелерімен бірге болашақ емдеу стратегиясын талқылау үшін дәрігерлермен кеңесіп жатыр.
Айта кетейік, 2023 жылы Байденнің терісінен қатерлі ісік анықталып, сол кезде ол сәтті алынып тасталған болатын.