Журналист Мысырда қаза тапқан Ақмарал Мұқанова туралы айтып берді

SMARTNEWS.KZ басылымының хабарлауынша, Мысырдың Шарм-эль-Шейх әуежайында жарнама қалқанының құлауынан көз жұмған қазақстандық әйел туралы Tengrinews.kz басылымына оның кіндік баласы, журналист Анвар Шалекенов естелік айтып берді.

"Бұл — менің кіндік шешем. Ақмарал Мұқанова анамның бала күнгі құрбысы. Біз отбасымызбен араласатын едік", — деді Анвар.

Марқұм ұзақ жылдар бойы Ақтөбе облысында ішкі істер саласында қызмет еткен. Кейін зейнетке шығып, ұлымен бірге Астанада тұрған. Ұлы жуырда ғана университет бітірген.

"Ол — өте жарық жан еді. Жарқырап жүретін, үнемі күлімдеп. Шынымды айтсам, өткен шақпен айтуға тілім бармайды", — деп еске алды журналист.

Шалекенов кіндік шешесінің елгезек, жаны жайсаң адам болғанын айтады.

"Ешкімді назардан тыс қалдырмайтын. Мен оны форма киген күйінде елестетем, нағыз абыройлы офицер болды", — дейді ол.

Ақмарал Мұқанова саяхаттауды жақсы көрген. Ұлымен бірге жиі сапарлайтын.

"Олар сол күні бірге жүрген. Ұлы әлі Мысырда. Бұл — біз үшін ауыр соққы. Жексенбі күні қайғылы хабар келді. Ондай болады деп ешқашан ойлаған емеспіз", — деді Шалекенов көзіне жас алып.

Еске салайық, қайғылы оқиға 17 мамыр күні ауа райының қолайсыздығынан Шарм-эль-Шейх әуежайында болған. Жарнама қалқаны құлап, төрт адам зардап шеккен. Олардың бірі — Ақмарал Мұқанова — оқиға орнында көз жұмған. ҚР Сыртқы істер министрлігі марқұмның туыстарымен байланыс орнатып, қажетті көмекті көрсетіп жатыр.