RUS
SMARTNEWS.KZ басылымының хабарлауынша, Мысырдың Шарм-эш-Шейх әуежайында қаза тапқан Ақмарал Мұқанованың жақын құрбысы Венера Искакова марқұмның денесін Ақтөбеге жеткізуге көмек сұрады. Қазір Мұқанованың ұлы әлі де сол жақта, анасының жанында.
Ақмарал Мұқанова – Ақтөбе облыстық Полиция департаментінің кадр қызметінде ұзақ жыл еңбек еткен, зейнетке шыққан соң Астанада тұратын ұлының қасына көшіп барған. Анасы мен баласы жиі саяхаттаған, бұл сапар да солардың бірі еді.
– Ақмарал – менің өмірлік жан құрбым. Біз 1970 жылы Байғанин ауданындағы Қарауылкелді орта мектебіне бірге бардық. 1980 жылы мектепті бітіріп, ол Алматыға оқуға түсті. Кейін Талдықорғанда заңгер мамандығын алып, Ақтөбеде, Сазды полиция бөлімінде еңбек жолын бастады. Ақтөбе қалалық полиция басқармасынан зейнетке шықты. Кеше болған қайғылы жағдайды алғаш ұлынан естідім. Сағат 12:00 шамасында әлеуметтік желіден қайғылы оқиғаны көріп, Ақмаралға хабарласайын деп ойладым, бірақ сәл кейінге қалдырдым. Сосын кенет ұлы “Анамнан айырылып қалдым” деп жазды, – дейді Венера Искакова көзіне жас алып.
Оның айтуынша, баласы дипломаттармен бірге, тергеу жүріп жатқанын айтқан. Бірақ марқұмның денесі 3-4 күннен кейін ғана елге жөнелтілуі мүмкін.
– Әуежайда оқиға орны қоршалмаған, қан іздерін де бірден сүртіп тастаған. Бұл да бізге күмән тудырады. Іс дұрыс тергелмей қала ма деп қорқамыз. Енді ең бастысы – денесін Ақтөбеге жеткізу. Ол осы қалада өмір сүрді. Астанаға үш жыл бұрын ғана көшіп барған. Ақмарал өте ақкөңіл, күлімдеген, жайсаң жан еді. Соңғы рет сәуір айында жолыққан едік. Енді баласының жағдайына қатты алаңдап отырмын. Телефон қуаттап жатқан сәтте, дәл сол мезетте бұл қайғылы оқиға болған екен, – деді Венера.
Марқұмның жақындары Қазақстан билігінен, Президент пен Үкіметтен, елшіліктен денені елге жеткізуге көмек сұрап отыр.