RUS
Жігер Ауыпбаевтың сөзінше ол өзі ғашық болған аруды ауылдағы концерттердің бірінде жолықтырған. Қонақ болып келген қыз бірден оның көзіне түскен.
"Қиналып жүрген сәттерде сол қыз жолығып, сөйлесе бастадым. Ондай кездерде адамның ішкі жан жүниесінде бірдеңе жетіспей тұрады. Жылы сөздің өзі күш боп тұрады. Жақсы бір жан жолықты. Көп нәрсе бастан өтті. Жақсы сәттердің барлығы өтті. Енді, міне, деп келе жатқан кезде қарсылықтар өте көп болды. Амал жоқ айырылысып кеттік. Бауырлары қарсы болды", - деді ол.
Әншінің айтуынша, ол концерт бойы бар әнін сол қызға қарап айтқан.
"Екеуіміздің танысқан кезіміз желтоқсан айының 13-і болатын. Мен сол ауылға концертпен барғам. Сол кезде ол қыздың ары-бері өтіп жүргенін көрдім. 1,5-2 сағаттық концертімде әндерді сол қызға қарап айттым десем болатын шығар. Бір көргеннен ғашық болдым. Ол қыз байқап отырды. Сахнада кім қалай қарап отырғанын - бәрін көріп тұрасың. Сөйтіп сол концерттен кейін желіден тауып алдым. Сөйтіп сөйлесе бастадым", - деп баяндайды әнші.
Сөзінше, ғашық болған арумен ары қарай Астанада жолығып, Есілдің жағасында қыдырған. 2 жыл бойы кездескенімен, ғашықтардың жолы бір арнада түйіспеген.
"Ол қызбен кездеспес бұрын ұзақ уақыт, үш жылдай депрессияда болған едім. Ажырасып жүрген кезім. Ондай еркекті кім жақтырады. Жаныма адам жолатпадым. Туған-туыстарым мен достарымнан алшақтай бастадым. Біреу бірдеңе айтып отырса, оны түсінбей отыратынмын. Сұқбатқа да бармадым. Баруға күш болмады. Ол қыз сол депрессиядан алып шығуға себеп болды. Екі жылға жуық созылды қарым-қатынасымыз", - дейді әнші.