RUS
SMARTNEWS.KZ басылымының хабарлауынша, Украина мен Ресей Түркиядағы келіссөздер отырысында тұтқындар алмасуға келісті.
Украина мен Ресей арасындағы соңғы үш жылдағы алғашқы тікелей келіссөздер Түркияда өтті. Алайда келіссөздер екі сағатқа да жетпей аяқталып, тараптар тек әскери тұтқындармен алмасу туралы ғана мәмілеге келді.
Келіссөзге қатысқан тараптардың айтуынша, алдағы күндері 1000 әскери тұтқын 1000-ға алмастырылады. Бұл – соғыс басталғалы бері тіркелген ең ауқымды тұтқын алмасу болмақ.
Ресей делегациясын президент Владимир Путиннің көмекшісі Владимир Мединский, ал Украина делегациясын қорғаныс министрі Рустем Умеров басқарды. Келіссөзге Түркия Сыртқы істер министрі Хакан Фидан да қатысты.
Қақтығысты тоқтату туралы келісімге қол қойылған жоқ. Украина тарабы бұл кездесудің негізгі жетістігі – тұтқын алмасу ғана екенін айтты.
Украина Сыртқы істер министрлігі Ресей тарапынан "қабылдауға болмайтын талаптар" қойылғанын растады, бірақ олардың нақты мазмұнын ашпады. Украиналық БАҚ-тың хабарлауынша, Мәскеу Киевтен Донецк, Луганск, Запорожье және Херсон облыстарынан әскерін толықтай шығаруды талап еткен. Айта кету керек, бұл өңірлердің ешқайсысын Ресей толық бақылауына алған жоқ.
Келіссөз барысында екі ел президенттерінің – Владимир Зеленский мен Владимир Путиннің – болашақта кездесуі мүмкін екені де талқыланған.
Түркия тарабы тараптардың жаңа кездесу өткізу жөнінде принципті түрде келісімге келгенін хабарлады.