RUS
SMARTNEWS.KZ басылымының хабарлауынша, Қарағанды тұрғыны Максим Наумкин бірнеше жылдан бері өзінің алаяқ емес екенін дәлелдей алмай жүр. Осыдан бес жыл бұрын ер адам көлігін сатып жатып, сатып алушылардың біріне құжаттарының суретін жіберген. Сөйтсе ол алаяқ болып шығып, Максим Наумкиннің атынан әрекет еткен. Аталған жайт туралы Astana.tv арнасы жеткізді.
Максим Наумкин осыдан 5 жыл бұрын өзінің “Жигули” маркалы көлігін сатпақ болып, танымал маркетплейстердің біріне хабарландыру жариялаған. Хабарласып, өзін сатып алушымын деп таныстырған азамат құжаттардың суретін жіберуін сұраған.
“Мен көлігімді "Kolesa.kz” қосымшасында саттым. Маған Шымкенттен бір адам хабарласып, өзін клиентпін деп таныстырды. Көлігімді сатып алатынын, сол үшін кепілпұл жіберітінін айтты. Кепілпұл жіберу үшін оған менің жеке куәлігім, карта нөмірім мен кепілпұл күтіп тұрған видео немесе фото керек болыпты”, – дейді Максим.
Ер адам сатып алушының айтқанының бәрін орындаған. Тек бір өтінішінен кейін оның сатып алушы емес, алаяқ екенін түсінген. Олар картаның артындағы үш сандық кодты жіберуін сұраған. Максим оған жіберген хаттарының бәрін өшіргенімен, кибералаяқ деректерді өзіне сақтап үлгерген. Содан бері белгісіз біреулер Максим Наумкиннің атын жамылып, елді алдап жүрген көрінеді. Олар сайтқа көліктерді арзан бағада сатамыз деген хабарландыру береді екен. Алайда сатып алушыдан кепілпұлды алып, көліксіз әрі ақшасыз қалдырады. Ал алаяққа алданғандар ақшасын Максим Наумкиннен сұрап келеді екен.
“Менің түрімді жаттап алыңыздар. Алаяқтар менің атымды жамылып, көліктерді хабарландыруға қойып, сатады. Бірақ онда көрсетілген нөмір менікі емес. Адамдар жіберген ақша маған емес, алаяқтардың нөміріне түседі. Олар ақшаны алып ізін суытқан соң, адамдар мені іздеп, менің үстімнен арыз жазады”, – дейді Максим.
Полиция да Максим Наумкиннің алаяқ емес екенін растады. Алайда алаяқтардың өзін ұстау қиынға соғып жатыр. Полицияның айтуынша, олар шетелде жүріп, өздерінің арам ойларын іске асырады.
“Біз картадағы транзакцияларды бақылап отырдық. Бірақ ақша Қазақстан Республикасынан тыс шетелге аударылатынын байқадық. Мұндайда ақшаны қадағалау қиынға соғады”, – дейді полиция.
Жыл басынан бері алаяқтар бір жарым мың жергілікті тұрғынды 4 миллиард теңгеге жуық сомаға алдап кеткен. Полиция жеке ақпаратты қорғау, SMS кодтарын жібермеу және мұндай қоңыраулардан кейін әрдайым 102 нөміріне қоңырау шалу маңызды екенін ескертеді.