Қалың қар жауып, көктайғақ болады: Алдағы үш күнде елімізде күн суиды

SMARTNEWS.KZ басылымының хабарлауынша, 23-25 қаңтарда Арктикалық суық ауа ағындары Қазақстан аумағына еніп, алдағы үш күнде температура төмендейді. 

23-24 қаңтар күндері еліміздің шығыс және оңтүстік-шығыс өңірлеріне Солтүстік-Батыс циклонының жырасы әсер етеді, салдарынан қатты қар жауады. Ал қалған аумақта жауын-шашынсыз ашық ауа райы болады деген болжам бар.

Ел бойынша бұрқасын, екпінді жел, көктайғақ және тұман деп болжанды.

Солтүстік өңірлерде түнде ауа температурасы 20-30 градус аяз, кей жерлерде 35 градусқа дейін қатты аяз болады, күндіз 13-20 градус аяз. Орталық пен шығыста түнде 20-35 градус, ал кейбір аудандарда 40 градусқа дейін қатты аяз. Оңтүстікте түнде 15-25 градус, кейбір жерлерде 28 градусқа дейін қатты аяз болады, күндіз температура 5-15 градус аяз шамасында сақталады.