RUS
SMARTNEWS.KZ басылымының хабарлауынша, Солтүстік Қазақстан облысының тұрғынына көлігін 5 минуттан астам қыздырғаны үшін салынған айыппұлды алып тастады.
СҚО прокурорлары көлігін бес минуттан астам қыздырғаны үшін салынған атышулы айыппұлды алып тастады. Ең бірінші жазаға тартылған елдің солтүстігіндегі қала тұрғыны Алтынбек Әлібеков болды. Прокурорлар полиция қызметкерлерінің заңсыз әрекет жасағанын дәлелдеген.
Автокөліктерді жылытуға берілген бес минуттық шектеуге ашуланған Әлібеков күтпеген жерден автокөлік жүргізушілерінің арасында жұлдызға айналған. Ол аязды күні Камри көлігін автостартер арқылы қыздырған. Сол сәтте көршілердің бірі оның үстінен шағым түсіріп, жедел полиция қызметкерлері келіп жеткен. Ер адам мемлекет тарапынан берілетін 50 пайыздық жеңілдікті ескере отырып, 9800 теңге айыппұлды төлеген.
Бірақ Алтынбек өзін кінәлі санамайтынын айтты. Өйткені аязды күні көлікті бес минутта жылыту мүмкін емес. Сенсациялық оқиғаға прокурорлар қызығушылық танытқан. Олар жүргізушіге заңсыз айыппұл салынғанын анықтап, ер адамның ақшасын қайтарған.
– Әкімшілік құқық бұзушылық туралы істі қарау барысында полиция қызметкері хаттама жасау кезінде процессуалдық бұзушылықтарға жол беріп, құқық бұзушының кінәсін растайтын дәлелдемелерді алмаған. Петропавл қаласы прокурорының наразылығынан кейін полицейлердің әрекеті заңсыз деп танылды. Кодекстің 597-бабының 1-бөлігімен көзделген әкімшілік құқық бұзушылық туралы іс бойынша іс жүргізу құқық бұзушылық белгілерінің болмауына байланысты тоқтатылды, – дейді Петропавл қаласы прокуратурасының басшысы Павел Семенов.