RUS
Бірегей білім беру жобасы Павлодар және Шығыс Қазақстан облыстарындағы 100-ге тарта оқушыны қамтиды. Осылайша алдағы уақытта 8-9 сынып оқушылары арасында іріктеу жүргізіліп, жұмысшы мамандықтарды таңдаған балаларға кәсіби бағдарлау шаралары өткізіледі. Ал қыркүйек айында колледждерге түсуге оқыту және кеңес беру түрінде көмек көрсетіліп, кейін оқу орнында тәлімгерлік қамқорлыққа алынады. Әрі қарай өңірде орналасқан «Самұрық-Қазына» АҚ портфельдік компанияларына жұмысқа тұруына ықпал етіледі.
«Бұл «Жұмысшы мамандықтарының жылы» аясында адами капиталды арттыруға, жаңа кадрларды дайындауға септігін тигізетін жобалардың бірі болмақ. Балаларды кәсіби бағдарлау үшін кешенді бағдарлама әзірленіп, онда жобаның барлық кезеңінде менторлық қолдау мен сүйемелдеу көрсетіледі. Олардың мамандықты саналы түрде таңдап, әрі қарай табысты маман атанулары үшін жан-жақты қолдау білдіреміз», - деп атап өтті «Samruk-Kazyna Trust» қорының басшысы Альфия Адиева.
Осы аптада Шығыс Қазақстан және Павлодар облыстарының әкімдіктерімен жоба бойынша тиісті ынтымақтастық жөнінде меморандумдарға қол қойылды.