RUS
SMARTNEWS.KZ басылымының хабарлауынша, әлеуметтік желіде алматылық бойжеткеннің анасын сабап кеткен ер адамның лайықты жазасын алуын талап еткен видеосы тарады.
Алматының 24 жастағы тұрғыны Анастасия Борисованың сөзінше, 5 сәуір күні жұмыстан келе жатқан анасын ер адам темір сойылмен ұрып, соққыға жыққан.
Басынан, қолынан ауыр соққылар алған әйелге жақын маңда жұмыс істейтін ер адамдар көмектескен. Жәбірленуші шұғыл түрде ауруханаға жеткізіліп, дәрігерлер оған қажетті медициналық көмек көрсеткен. Дегенмен зардап шеккен әйелге жүріп-тұру әлі де қиын көрінеді.
Осы жайттан соң Түрксіб аудандық полиция басқармасы адам денсаулығына қасақана орташа ауыр зиян тигізген адамға қатысты қылмыстық іс қозғағанын мәлімдеді.
Күдіктіні ұстап, жауапкершілікке тартуға бағытталған жедел шаралар кешені жүріп жатыр. Сонымен қатар оқиғаның басқа да мән-жайларын анықтау мақсатында тергеу басталды, - деп хабарлайды Алматы қалалық полиция департаментінің баспасөз қызметі.