Жемқорлық туралы хабарлаған алматылықтарға 1,2 млн теңге сыйақы берілді

SMARTNEWS.KZ басылымының хабарлауынша, Алматыда жемқорлық туралы хабарлаған екі адамға 1,2 млн теңге сыйақы берілді. Бұл туралы Kazinform жазды.

Алматы қаласы бойынша Сыбайлас жемқорлыққа қарсы іс-қимыл агенттігі департаментінің басшысы Арман Рахимовтың айтуынша, жыл басынан бері жемқорлықпен күреске бағытталған 66 іс-шара өтті. Оған 5 мыңнан астам адам қатысты.

— Сыбайлас жемқорлыққа қарсы мәдениетті қалыптастыру — біздегі басты басымдықтың бірі. Біз алдын алу, ағарту және азаматтық жауапкершілікке ерекше мән береміз, — деді ол өңірлік коммуникациялар қызметінде өткен баспасөз мәслихатында.

Спикердің сөзінше, «Сыбайлас жемқорлыққа қарсы волонтерлік» жобасы аясында Алматыда 262 ерікті жұмыс істейді.

— Бұл жоба жастар арасында ашықтық пен әділеттілік қағидаттарын насихаттайтын тиімді алаңға айналды, — деп атап өтті ол.

Сонымен қатар, ол биыл сыбайлас жемқорлық фактілері туралы хабарлаған екі адам 1,2 млн теңге сыйақы алғанын тілге тиек етті.

— 2024 жылы барлығы 9 азамат марапатталып, олардың алтауы 5,2 млн теңге көлемінде ақшалай сыйақы алды, — деді департамент басшысы.