RUS
SMARTNEWS.KZ басылымының хабарлауынша, Өзбекстанда айыппұлдан шаршаған азамат бақылау камераларына оқ жаудырып, 1 миллиард сум шығын келтірді.
Өзбекстанда 49 жастағы азамат жол ережесін бұзғаны үшін жиі айыппұл төлеуден қажып, заңсыз әрекетке барған. Ол Андижан қаласындағы 29 көшенің қиылысында орналасқан 52 бақылау камерасын пневматикалық қарумен атып, жарамсыз күйге түсірген.
Азаматтың бұл әрекеті мемлекетке 1 миллиард сум көлемінде шығын келтірді. Бұл сома қазақ валютасымен есептегенде шамамен 40 миллион теңгеден асады.
Қазір күдіктіге қатысты қылмыстық іс қозғалып, тергеу амалдары жүргізілуде. Айыпталушы өз әрекетін ашық мойындап, салынған айыппұлды өтеу үшін ел тұрғындарынан көмек сұрап, әлеуметтік желі арқылы үндеу жолдаған.