RUS
SMARTNEWS.KZ басылымының хабарлауынша, Руслан Берденовті атты деген күдікті Ернар Жиембайдың әкесі қайғылы оқиғаға байланысты ресми мәлімдеме жасады.
«Құрметті қазақстандықтар, Шымкент қаласының тұрғындары, бұқаралық ақпарат құралдарының өкілдері!
Біздің отбасымыздың атынан 21 сәуір күні орын алған қайғылы оқиғаға байланысты сіздерге үндеу жолдауды жөн көрдім.
Ата-ана үшін бұл жағдай — нағыз ауыр соққы болды. Бүгінге дейін ұлымыз Ернардың осындай қиын жағдайдың ортасында қалғанына сене алмай отырмыз», – деп жазды Жиембай Пралиев.
Сонымен қатар, әкесі тергеу мен соттың барлық жағдайды әділ, жан-жақты қарастыратынына сенім білдіріп, Берденовтің жазылып кетуіне тілектестік білдірді.
«Осы оқиғаға байланысты шын жүректен өкінішімізді білдіреміз. Қандай жағдай болмасын, бірінші кезекте Руслан Берденовтің тезірек сауығып кетуін тілейміз.
Біз тергеу мен соттың барлық жағдайды әділ, жан-жақты қарастыратынына сенім артамыз. Баршаңызды сабырға шақырып, нақты шешім шықпай тұрып, асығыс қорытынды жасамауды сұраймыз», – деп жазды Жиембай Пралиев.
Жиембай Пралиев келінінің Берденовті танымайтынын айтты.
«Ең бастысы – бұл жағдайға еш қатысы жоқ келінімізді араластырмауды өтінеміз. Ол Руслан Берденовті бұрын-соңды көрмеген де, танымайды да.
Осы қиын күндері қолдау білдіріп жатқан жандарға алғысымыз шексіз. Алда бізді ауыр кезең күтіп тұр, дегенмен әділдік пен адамгершілік жеңеді деп үміттенеміз», – деп жазды Жиембай Пралиев.