RUS
SMARTNEWS.KZ басылымының хабарлауынша, Өзбекстанның Самарқанд облысында балалардың тізерлеп кешірім сұраған видеосына қатысты тексеріс жүріп жатыр.
Әлеуметтік желіде тараған видеода екі оқушы – ұл мен қыз – өз құрбысының алдында тізерлеп кешірім сұрап тұрғаны бейнеленген. Видео қоғамда үлкен резонанс тудырып, оқиғаға қатысты білім беру саласының және құқық қорғау органдарының тексеруі басталды.
Жазбада балалар басын иіп, аяқ жағында отырған қыздан кешірім сұрап тұрғаны көрінеді. Кадр сыртында ересек адамның дауысы естіледі: "Кешірдің бе?", әрі қарай: "Біз бәрібір оны мектептен шығарамыз" деген сөздер айтылады. Пайдаланушылардың айтуынша, видеодағы ұл мен қыз – балалар үйінің тәрбиеленушілері, ал үшінші қыз – ықпалды отбасының қызы. Аталған оқиға шамамен 2024 жылдың сәуірінде Самарқанд облысы Пахтачин ауданындағы №21 мектепте болған.
Бастапқыда бұл жағдай кеңінен танымал болмағанымен, видео желіде тарағаннан кейін қоғам назарын аудартып, жергілікті билік оқиғаның мән-жайын зерттеуге кірісті.
Самарқанд облысының білім басқармасы оқиғаның мән-жайын түсіндіріп өтті. Олардың мәліметінше, оқушы ұл өз сыныптас қызға тіл тигізіп, оның атына жағымсыз қауесет таратқан. Бұл жағдайды мектеп ішінде шешудің орнына мектеп директорының орынбасары, сынып жетекшісі және мектеп психологы баланы әпкесімен бірге жәбірленушінің үйіне ертіп апарып, тізерлетіп кешірім сұратқан. Осы сәт видеоға түсіріліп, кейіннен әлеуметтік желіде тарап кеткен.
Білім беру министрлігі бұл оқиға бойынша қызметтік тексеру жүргізілгенін хабарлады. Оның нәтижесінде оқиғаға қатысы бар үш педагогқа тәртіптік шара қолданылған. Сонымен қатар оқушылармен профилактикалық түсіндіру жұмыстары жүргізілген. Бұдан бөлек, оқиғаға құқық қорғау органдары да араласып, өз алдына тергеу бастаған.
Қазіргі таңда оқиғаның толық мән-жайы анықталып жатыр. Балалардың не үшін кешірім сұрағаны, видеоның кім және не мақсатпен түсіргені нақты айтылмады. Тергеу аяқталғаннан кейін нақты қорытындылар жарияланады деп күтілуде.