RUS
SMARTNEWS.KZ басылымының хабарлауынша, Атырауда 2 жасөспірімге қасақана дене жарақатын салған күдіктілер ұсталды.
Атырау облыстық полиция департаментінің баспасөз қызметінен мәлім еткендей, оқиға мұнайлы шаһар маңындағы Еркінқала ауылдық округінде болған.
- Екі жасөспірімге қасақана дене жарақатын салған барлық күдікті анықталып, полиция бөліміне жеткізілді. Күдіктілердің кәмелет жасына толмауына байланысты заңды өкілдерінің қатысуымен жауап алынады. Қазір аталған оқиғаға байланысты қылмыстық іс тіркеліп, кешенді тергеу амалдары жүргізіліп жатыр. Өзге ақпарат тергеу мүддесіне сәйкес жариялауға жатпайды, - деп хабарлады департаменттің баспасөз қызметі.
Жәбірленушілерге сот-медициналық сараптамасы тағайындалды. Оқиғаның барлық мән-жайын анықтау басталған.
Айта кетейік, бұған дейін желіде жәбірленушінің анасы атыраулық қоғам белсендісі Рүстем Баязиевке хат жолдаған еді.
- Кеше Еркінқала орта мектебінде оқитын, 8-сыныптағы жасөспірім баламды сабақтан шыққан соң шаруашылық жұмысына бармағаны үшін аяусыз таяқпен сабаған. Ұрып-соққан бір баланың әкесі - өзі құқық қорғау органында жұмыс істейді екен.
Кеше полицияға арыз жаздық, бірақ істі жылы жауып тастайды ма деп қорқып отырмыз. Сізден әділдік сұрап, осыны жазып отырмын. Баламды ұрып, жұмыс істеуге мәжбүрлеп, ақша талап етіп, бопсалаған, - деп хат жазды шарасыз ана.