RUS
SMARTNEWS.KZ басылымының хабарлауынша, Франция президенті Эммануэль Макрон мен жұбайы Брижиттің Вьетнамға сапары кезінде болған бір сәт әлеуметтік желіде қызу талқыланды.
Камера объективіне түсіп қалған видеода Брижиттің күйеуінің бетін итеріп, түрткі бергені анық көрінеді. Алайда бұл жағдай отбасылық жанжал емес, әзіл-қалжың болды, дейді тараптар.
Макрон 26 мамырда бұл жайлы журналистерге:
«Жәй қалжыңдасып жатқан едік. Ешқандай дау-жанжал болған жоқ. Ұсақ нәрсе», – деп түсініктеме берді.
Елисей сарайы да бұл әрекетті «жол жүрер алдындағы отбасылық еркін сәт, күлкі мен жақындық көрінісі» деп сипаттады.
AP агенттігі жариялаған кадрларда Брижит Макрон күйеуінің бетінен ұрып, бір сәтке қолын итеріп тастағаны анық байқалады. Бұл әрекет камерада түсіп қалғанын байқаған Эммануэль Макрон жымиып, камераға қол бұлғап жауап қайтарды. Кейін ерлі-зайыптылар бірге ұшақ трапынан түсті. Дегенмен Брижит Макрон күйеуінің қолын ұстаудан бас тартқандай көрінді.
Мәскеу де бұған ресми үн қатты. Ресей Сыртқы істер министрлігінің ресми өкілі Мария Захарова Telegram-да:
«Макрон Вьетнамға қонғанда жұбайынан оңдырмай «шапалақ» алған сәт бүкіл әлемді шарлап кетті. Енді Елисей сарайы бұл жолы қандай «аңыз» ойлап табатынын көрейік», – деп жазды.
Сондай-ақ Захарова бұған дейінгі бір оқиғаны еске салды. Онда Макрон мен Германия канцлері Фридрих Мерц журналистер көзінше «ақ ұнтақ» салынған пакетті жасырғандай көрінген болатын. Кейін жоғары сапалы суреттерді зерттеген БАҚ бұл тек қағаз майлық пен тіс шұқығыш болғанын анықтады.