RUS
SMARTNEWS.KZ басылымының хабарлауынша, Шымкент қаласында жалғызбасты ана Фаузия Ахметова өзін белгісіз үш ер адамның Түркістандағы үйінен күштеп алып кетіп, «Көмек центр» деп аталатын оңалту мекемесінде 10 күн бойы заңсыз ұсталғанын мәлімдеді.
Әйелдің айтуынша, 25 сәуір күні таңғы сағат 05:30 шамасында оны балаларының көзінше белгісіз адамдар алып кеткен. Шымкенттегі орталықта оны медициналық немесе құқықтық негізсіз ұрып-соғып, беймәлім құжаттарға қол қойдыруға мәжбүрлеген.
«Есірткі немесе психобелсенді заттарға еш қатысым жоқ, еш тіркеуде тұрмаймын. Қарсыласқаным үшін дәрі ішкізіп, байлап тастады. Өз-өзіме қол жұмсап, қолымды бірнеше рет кестім», – деді ол видеоүндеуінде.
Ахметова 5 мамыр күні ғана туыстарымен байланысқа шығып, солардың көмегімен орталықтан шыққан. Оның айтуынша, сол мекемеде кәмелетке толмаған балалар да заңсыз ұсталып отырған.
Фаузия Ахметова Шымкент қалалық Полиция департаментіне арыз жазғанымен, жиырма күн өтсе де тергеу басталмағанын айтты. Ол орталықтың әлі де жұмыс істеп тұрғанын, құқық қорғау органдары мен мекеме арасында ықтимал сыбайластық барын жоққа шығармайды.
Ал полиция департаменті бұл іс бойынша тергеу басталғанын мәлімдеді.
«Орталықтың қызметі, құжаттамасы және екі тараптың уәждері зерделеніп жатыр. Тергеу заң шеңберінде жүргізілуде», – деп хабарлады ведомство.
Фаузия Ахметова Президент Қасым-Жомарт Тоқаевқа үндеу жасап, істі жеке бақылауға алып, кінәлі тұлғалардың жауапқа тартылуын сұрады.