RUS
SMARTNEWS.KZ басылымының хабарлауынша, Түркістан облысында 12 жастағы Ұлағат Сайдұлланы сыныптасы қылқындырып өлтірген. Қайғылы жағдай сабақ кезінде мектеп ішінде болған.
Марқұмның анасы Гүлмира Көшееваның айтуынша, балалар мұғалімнің қарауынсыз қалып, телефон үшін жанжал кезінде бірі екіншісін тұншықтырған. Оқушы есінен танып құлаған соң, сыныптастары су шашып, қолдан келгенінше көмек көрсетуге тырысқан. Бірақ мұғалімдер келгенше бала көз жұмған.
— Қасындағы бала телефон алып барған. Бұл тартып алған. Артынан қуып келіп, партада отырған жерінен қылқындырыпты. Ешкім араша болмаған. Мұғалім жоқ. Оқушылар медбикені де шақырмаған, өздері су шашып әлек болған, — дейді Гүлмира Көшеева.
Оқиға 7 ақпан күні болған. Анасы ұлын мектепке аман-сау жібергенімен, бірнеше сағаттан кейін мектепке шақыртылып, ұлын ес-түссіз күйде көрген. Ұлағат сол жерде жан тапсырған.
Анасының айтуынша, пән мұғалімі — мектеп директорының орынбасары — оқушылармен бірге болмай, жеке кабинетінде отырған. Сынып жетекшісі мектепте болмаған, ал кезекші мұғалім балалардың айқайын ести тұра, есікті жауып кетіп қалған.
— Мұғалімдер “балада жүрек ауруы болған, эпилепсиясы бар” деді. Бірақ сараптама нәтижесі баланың денсаулығында еш кінәрат болмағанын көрсетті. Ресми қорытынды — қылқындыру. Тілі жұтылып, демі тоқтаған, — дейді анасы.
Оқиғадан соң мектеп директоры, оның орынбасары және тағы төрт мұғалім қызметінен босатылған. Алайда олар қайта жұмысқа орналасу үшін еңбек инспекциясына шағым түсірген.
— Еңбекті қорғау инспекциясы шешімнің заңдылығын тексеріп жатыр. Бізге берілген нұсқамада бұйрықтардағы баптар дұрыс көрсетілмегені жазылған, — деді А.Оразбаева атындағы мектеп директоры Өмірсерік Кенжеев.
Полиция бұл оқиғаға қатысты әзірге түсініктеме бермеген. Белгілісі, қайтыс болған баланың сыныптасын кінәлі деп танып, оның ата-анасына айыппұл салынған.