RUS
SMARTNEWS.KZ басылымының хабарлауынша, Пәкістанда қыз балалардың некеге тұруының ең төменгі жасы 16-дан 18-ге көтерілді. Бұл туралы The Telegraph басылымы хабарлады.
Жаңа заң парламенттің екі палатасында да бірауыздан қабылданды. Құжат ерте жастағы некеге тосқауыл қоюды және балалардың құқығын қорғауды көздейді.
Енді кәмелетке толмаған адамның, яғни 18 жасқа толмаған баланың өзіне қамқор емес ересекпен бірге тұруы – зорлау деп бағаланады. Мұндай әрекет үшін жеті жылға дейін бас бостандығынан айыру және кемінде 1 миллион пәкістандық рупий (шамамен 1,6 млн теңге) көлемінде айыппұл қарастырылған.
Дегенмен, бұл заңға Пәкістанның Ислам идеологиясы кеңесі қарсы шықты. Кеңес бұл заң ислам нормаларына қайшы деп санайды. Олар бала некесін қолдамайтындарын айтқанымен, 18 жасқа дейінгі некені зорлау деп тануға қарсы.
Бұған дейін елде британдық отарлық кезеңнен қалған ескі заңнама бойынша, ұлдар үшін – 18, қыздар үшін – 16 жас некеге тұрудың заңды шегі болып келген. Бірақ іс жүзінде көптеген қыз бала ерте жаста күйеуге берілуінжалғастырып келген.
Жаңа заң әзірге ел астанасы Исламабад аумағында ғана күшіне енді. Билік оны болашақта бүкіл ел бойынша енгізуді жоспарлап отыр.
Заң жобасын талқылау кезінде сенатор Насима Эхсан сөз алып, өзін 13 жасында тұрмысқа бергенін айтып, мұндай тәжірибеге нүкте қою қажеттігін атап өтті.
Құжатта бала неке екі жынысқа да зиян келтіретіні, әсіресе жыныстық жетілу кезеңіндегі, аналыққа психологиялық және физикалық тұрғыдан дайын емес қыз балалар үшін қауіпті екені баса айтылған.