RUS
SMARTNEWS.KZ басылымының хабарлауынша, танымал дәстүрлі әнші, ҚР «Ерен еңбегі үшін» медалінің иегері Наркенже Серікбаева Түркістан облыстық Шәмші Қалдаяқов атындағы филармония басшысы тарапынан қысым көргенін мәлімдеді. Бұл туралы ол Instagram парақшасында жариялаған бейнеүндеуінде айтты.
«Филармония басшысы Ғалымжан мырза киімің жоқ деген сылтаумен мені сахнадан шеттетіп, «Менің алдыма отыр, мен сені иіскеуім керек» деген сөздер айтты. Бұл — менің ғана емес, көп қыз-келіншектің көріп жүрген қорлығы. Қанша жыл қызмет еттім, мұндай әділетсіздік болмаған еді»,— деді ол.
Серікбаеваның айтуынша, басшылық оның абыройын қызметкерлердің көзінше таптап, сахнаға шығуына тыйым салған. Әнші бұл әрекетті өзінің «махаббат құрмағаны» және шындықты айтқаны үшін жасалған қысым деп есептейді.
Кейіннен филармония директоры Ғалымжан Ерназаров ресми мәлімдеме жасап, өзіне тағылған айыптарды теріске шығарды. Оның айтуынша, әнші жұмысына дұрыс қатыспаған.«2003 жылдан бері осы мекемеде жұмыс істеп келемін. Мен бұл жерден зейнетке шыққым келеді. Сахнадан осылай шеттету — әділетсіздік. Осы жолы соңына дейін барамын», — деді ол.
«Соңғы уақытта Наркенже ханым жиі гастрольде жүр. Бірде Қызылордада, бірде Жезқазғанда. Жұмысқа мүлде келмейді. Біз оны жұмыстан босатуымыз керек еді, бірақ жанашырлық таныттық», — деді ол филармонияның ресми парақшасында жарияланған видеомәлімдемеде.
Директор өзіне қатысты мәлімдемелер үшін сотқа жүгінгенін айтып, шешімді заң органдары шығаратынын жеткізді.