RUS
SMARTNEWS.KZ басылымының хабарлауынша, Ақтөбе облысы Жарлы ауылында көршісінің қызын құтқармақ болған бапкер Нұрбол Бердіғалиевтің өлімі елді есеңгіретті. 9 жасар қыз бала қоқысқа толы терең құдыққа құлап кеткенде, 1987 жылғы жаттықтырушы көмекке ұмтылып, артынан өзі де ажал құшты. Марқұмның артында алты бала қалды. Бұл туралы спорт журналисі Ақырыс Сейітқазы жазды.
“Бердіғалиевтің артында 2014, 2015, 2018, 2019, 2022 және 2025 жылы туған алты баласы қалды. Ең кенжесі — бес айлық. Жұбайы жұмыс істемейді. Отбасы мемлекеттен небәрі 94 мың теңге жәрдемақы алады”, – деді журналист.
Сейітқазының айтуынша, отбасы әлі күнге дейін мемлекеттік үйде тұрып жатыр. Нұрбол 2019 жылы “Дипломмен ауылға” бағдарламасы арқылы Жарлы ауылынан үй алғанымен, баспана толық төленбегендіктен, заңды түрде өз атына өтпеген. Қазір бұл үй мемлекет меншігінде. Сол себепті, журналист Ақтөбе облысы әкімдігінен отбасының баспана мәселесіне назар аударуды сұрады.
“Алты баласы бар отбасына Ақтөбеден пәтер берілсе, балалар орталықта білім алуға мүмкіндік алар еді”, – деді ол.
Марқұм жаттықтырушы ауыл спортын өркендетуге барын салған. Аз жалақыға қарамастан, шәкірттерінің спорттық киіміне, жарыс жолына, демалысына қаражат тауып, жеңімпаздарға сыйақы да ұйымдастырып отырған.
“Ол Жарлыдан жұлдыз шығарам деп армандады. Шәкірттері ел чемпионатында жүлде алып, «Ауыл спорты» жобасында топ жарған. Нұрболдың арманы — Байғаниннен Олимпиада чемпионын шығару еді…”, – дейді әріптестері.
Еске салайық, қайғылы оқиға 19 маусымда болған. Аулалардың бірінде 9 жастағы қыз бала шамамен 10 метр тереңдіктегі құдыққа түсіп кеткен. Жанұшырып жеткен бапкер қызды құтқармақ болғанымен, өзі де құдықтан шыға алмай, көз жұмды.