RUS
SMARTNEWS.KZ басылымының хабарлауынша, Ақтөбеде екі айлық қыз баланың өліміне себепкер болған 37 жастағы әйелге сот үкімі шықты. Сот отырысында ол өз кінәсін мойындап, баласына немқұрайлы қарағанын растады.
Оқиға өткен жылдың қараша айында басталған. Жүкті Карина (шын есімі — Тамара) Ақтөбедегі дәмханалардың бірінде Айнұр есімді әйелмен танысып, баспанасыз жүргенін айтқан. Айнұр оны аяп, өзі жұмыс істейтін «Абдуллах» шаруа қожалығына ертіп әкеледі.
Бірнеше күннен кейін Карина шөп тасу кезінде босанып қалады. Жанында болған көршісі Бибігүлдің көмегімен қыз бала дүниеге келген. Алайда құжаттарының болмауына байланысты жедел жәрдем шақырылмайды, ал жаңа туған нәресте ешбір ресми тіркеуден өтпейді — туу туралы куәлік жасалмайды, медициналық тексеру де жүргізілмейді, екпе де салынбайды.
Екі ай өткен соң сәби шетінеп кеткен. Баланың өлімі туралы алғашқы болып Бибігүлге Айнұр хабарлайды. Кейін бұл ақпарат ауыл имамы мен әкімінің араласуымен құқық қорғау органдарына жеткен.
Сот-медициналық сараптама баланың екі жақты пневмония, бронхит және ауыр ангина салдарынан жедел тыныс жетіспеушілігінен көз жұмғанын көрсетті. Дәрігерлер егер бала дер кезінде емделсе, аман алып қалуға болар еді деп мәлімдеді.
Сот Каринаны (Тамараны) Қылмыстық кодекстің 119-бабы ("Көмексіз қалдыру") бойынша кінәлі деп танып, 1 жылға бас бостандығынан айыру туралы үкім шығарды.