RUS
SMARTNEWS.KZ басылымының хабарлауынша, Астана қаласының апелляциялық соты алаяқтық бойынша айыпталып жатқан Перизат Қайрат құрған Biz Birgemiz Qazaqstan 2030 қайырымдылық қорын жою туралы алғашқы сот шешімін күшінде қалдырды. Осылайша, Перизат Қайраттың қор жұмысын қалпына келтіруге жасаған тағы бір талпынысы сәтсіз аяқталды.
Бұған дейін Астананың экономикалық соты Әділет министрлігінің талап-арызы негізінде қорды мәжбүрлеп жою туралы шешім шығарған болатын. Сот материалдарына сәйкес, Перизат Қайрат қорды тіркеу кезінде басқа «құрылтайшылардың» қолдарын қолдан жасап, олардың деректерін рұқсатсыз пайдаланған. Сот-сараптамалық зерттеу бұл деректі растады. Протоколда аты-жөні көрсетілген азаматтар жобадан мүлде бейхабар екенін мәлімдеген.
Сот шешімінде қорды тіркеу заң талаптарын бұзып қана қоймай, азаматтардың конституциялық құқықтарының бұзылуына алып келгені көрсетілген. Бұл — қорды жоюға негіз болған басты себеп.
Айта кетейік, Перизат Қайратқа 3,5 миллиард теңгені жымқыру бойынша қылмыстық іс қозғалған. Бұл қаражат су тасқынынан зардап шеккен балалар мен Газа секторындағы тұрғындарға көмек көрсету үшін жиналғаны айтылған. Алайда Қаржылық мониторинг агенттігінің мәліметінше, қаржы ешқандай қайырымдылық мақсатқа жұмсалмаған. Керісінше, Перизат Қайрат пен оның анасы Ғайни Алашбаева бұл қаражатты жеке қажетіне жаратқан.
Тергеу мәліметі бойынша, бұл ақшаға қымбат көліктер, пәтерлер, сәнді киімдер мен әшекей бұйымдар сатып алынған. Қазіргі уақытта бүкіл мүлікке тыйым салынған, ал Перизат Қайраттың анасы да іс бойынша күдікті ретінде қаржы жымқыру мен ақшаны заңдастыру баптары бойынша айыпталып, үйқамаққа алынған.
Қор ешқашан ашық қаржылық есеп жарияламаған, ал оның атауы халық арасында танымал «Birgemiz» платформасына ұқсастырылып, қоғамды адастыруға бағытталғаны да тергеу кезінде анықталған.
30 маусымда іс Астанадағы қылмыстық істер жөніндегі мамандандырылған ауданаралық сотқа жолданды.