RUS
SMARTNEWS.KZ басылымының хабарлауынша, Астанада рэпер Qurt (шын есімі — Дамир Қойшыбаев) пен оның әйелі Аружан Қойшыбаева арасындағы тұрмыстық жанжалға қатысты іс сотта татуласумен аяқталды.
Әйел өз арызын кері қайтарып алған. Қазіргі уақытта бұл іске байланысты қосымша тексеру жүріп жатыр. Бұл туралы қалалық Полиция департаменті ресми түрде мәлімдеді.
Полиция мәліметінше, 27 маусым күні «102» арнасына келіп түскен қоңыраудан кейін оқиға орнына тәртіп сақшылары барған. Олар қорғану нұсқамасын толтырып, ер адамды уақытша ұстау изоляторына жеткізген.
Іс ҚР Әкімшілік құқықбұзушылық туралы кодексінің 73-бабы — «Отбасылық-тұрмыстық қатынастар саласындағы құқыққа қарсы әрекеттер» бойынша сотқа жолданған. Алайда сот отырысында тараптар татуласып, Аружан Қойшубаева жазбаша түрде шағымынан бас тартқан.
— Мұндай істер бойынша татуласу тек сот арқылы жүзеге асырылады. Қазіргі сәтте жәбірленушіден басқа өтініштер түскен жоқ. Қосымша тергеу амалдары жүргізіліп жатыр. Нәтижесіне қарай, соққы жұмсау фактісі бойынша қылмыстық іс қозғау мәселесі қаралады, — деп хабарлады Астана Полиция департаменті.
Бұған дейін Аружан Қойшыбаева Instagram парақшасында күйеуінің өзін бір сағат бойы белдікпен ұрғанын жазған. Оның айтуынша, белдік үзіліп қалған соң Qurt басқа ремень алған. Сонымен қатар, ол күйеуінің шетелге кетуге ниетті екенін, достары тарапынан қорқытулар болғанын, тіпті видеожазба арқылы бас тартуға мәжбүрлеуге тырысқандарын мәлімдеген. Сондай-ақ, музыканттың анасы да қысым көрсеткенін айтқан.
Полиция бұл мәліметтерді де тексеріп жатқанын атап өтті.