RUS
SMARTNEWS.KZ басылымының хабарлауынша, Қонаев қаласында ер адам әйелін көліктің ішінде ұрып-соғып жатқан сәт түсірілген видео әлеуметтік желіде тарады. Жантүршігерлік жағдай балалар мен көшедегі адамдардың көз алдында болған.
Оқиға куәгерлері бей-жай қалмай, зардап шеккен әйел мен екі баланы қауіпсіз жерге алып кеткен.
«Бұл – үйде шай ішіп отырып жұдырық ала жүгіретін «асүйдің батыры». Әйелін ұрып, боқтап отыр», – дейді видео авторы.
Алматы облыстық Полиция департаменті бұл жағдайды растады. Күдікті ұсталып, полиция бөліміне жеткізілген. Қазір оның үстінен “Дене жарақатын салу” бабымен қылмыстық іс қозғалды.
«Сотқа дейінгі тергеу аясында барлық заңды процессуалдық шаралар жүргізіліп жатыр. Тараптардың уәждері мен дәлелдері толық тексеріледі», – делінген ресми хабарламада.
Тергеу аяқталғаннан кейін іс материалдары сотқа жолданады.