RUS
Ипотека рәсімдегенде, пәтердің бағасын емес, болашақтағы қарызды есептеңіз! – деп мәлімдеді Ұлттық банк төрағасы Тимур Сүлейменов баспасөз мәслихатында деп хабарлайды SMARTNEWS.KZ басылымы.
Оның айтуынша, қазіргі базалық мөлшерлеме мен қымбат ақша нарығы ұзақ мерзімді ипотекаларды азаматтар үшін тиімсіз етіп отыр.
— 10, 15, 20 жылға ипотека алу — ертеңгі күні пәтер үшін 3-4 есе артық төлеу деген сөз. Қазір «шамам келеді» деп ойлауыңыз мүмкін, бірақ 10 жылдан кейін сол несиені төлеп отыра аласыз ба? Бұл – үлкен тәуекел, – деді банк басшысы.
Осыған байланысты ипотека саясатын қайта қарау ұсынылып отыр. Қаржы нарығын реттеу және дамыту агенттігі бірнеше өзгеріс бойынша жұмыс жүргізуде. Олардың ішінде:
• Жылдық мөлшерлемені 20%-дан асырмау;
• Ипотекалық нормативтерді қайта есептеу;
• Бастапқы жарнаның көлемін ұлғайту;
• Қарыз алушының төлем қабілетін қатаң тексеру секілді шаралар бар.
Мамандардың айтуынша, бұл өзгерістер тұрғындарды ұзақ мерзімді қарыз құрсауынан сақтап, банк жүйесінің тұрақтылығын арттыруға бағытталған.