RUS
SMARTNEWS.KZ басылымының хабарлауынша, АҚШ Бас прокуроры Пэм Бонди 2025 жылдың мамыр айында ел президенті Дональд Трампқа оның есімі Джеффри Эпштейнге қатысты іс материалдарында кездесетінін мәлімдеді. Бұл туралы The Wall Street Journal газеті жазды.
Газет жазуынша, құжаттарда көптеген танымал адамдарға қатысты «растаусыз алып-қашпа әңгімелер» бар. Олардың қатарында АҚШ президенті Трамп та аталады. Ол бұған дейін Эпштейнмен жеке араласқаны белгілі. Алайда дереккөздердің бірі бұл істе Трамптан бөлек жүздеген адамның аты кездесетінін айтады.
Ақ үйдегі «әдеттегі брифингтердің» бірінде Бонди бұл ақпаратты Трампқа жеткізген. Алайда басылымның мәліметінше, президенттің аты аталғаны сол кездегі жиынның негізгі тақырыбы болмаған. Сонымен қатар WSJ Трамптың аталған істе аталу фактісі оның заң бұзғанын білдірмейтінін ескертеді.
Пэм Бонди Трампқа Әділет министрлігі бұл тергеуге қатысты басқа ешқандай құжатты жарияламайтынын да айтқан. Мұндай шешімнің себебі — істе кәмелетке толмағандарға қатысты порнографиялық материалдар мен жәбірленушілердің жеке мәліметтері бар.
Айта кетейік, Джеффри Эпштейн АҚШ-та кәмелетке толмағандарды жезөкшелікке тартты деген айыппен қамауға алынған болатын. Бүгін Флоридадағы Оңтүстік округ соты президенттің өтінішімен бұл іске қатысты Үлкен алқабилер отырысының стенограммасын жариялаудан бас тартқаны белгілі болды.