RUS
SMARTNEWS.KZ басылымының хабарлауынша, Шымкент қаласы әкімінің орынбасары Руслан Берденовке жасалған қастандық дерегі бойынша сот процесі басталды. Қылмыстық іс қаладағы қылмыстық істер жөніндегі мамандандырылған ауданаралық сотта қаралуда.
Басты айыпталушы – бұған дейін «Тұрғын үй Шымкент» ЖШС-ін басқарған Ернар Жиенбай. Сотқа төрағалық етіп отырған судья – Әбінұр Қарабаев. Іс мемлекеттік тілде және ашық форматта қаралып жатыр. Алайда судья айыпталушыны бейнежазбаға түсіруге тыйым салды.
Ернар Жиенбайға Қылмыстық кодекстің екі бабы бойынша айып тағылған: 24-баптың 3-бөлігі («Қылмысқа дайындалу және қылмыс жасауға оқталу») және 99-баптың 1-бөлігі («Адам өлтіру»).
Айта кетейік, Руслан Берденовке қарулы шабуыл биыл 21 сәуірде әкімдік ғимаратының маңында жасалған болатын. Ол кезде Берденов қала әкімінің орынбасары болып тағайындалғанына небәрі екі ай болған. Бұған дейін ол Парламент Мәжілісінің депутаты қызметін атқарған.