RUS
SMARTNEWS.KZ басылымының хабарлауынша, Газа секторының билігі Израильді гуманитарлық көмек керуендерін әдейі ұйымдастырылған хаос жағдайында тоналуға жол берді деп айыптады.
«Бүгін Газадағы блокадаға қарамастан бар болғаны 87 жүк көлігі гуманитарлық көмекпен аймаққа кірді. Бірақ олардың басым бөлігі тәртіпсіздік пен анархия аясында тоналып кетті. Бұл — Израиль әдейі құрған хаос салдары», — делінген Газа үкіметінің баспасөз қызметі таратқан мәлімдемеде.
Мәлімдемеге сәйкес, израильдік армия алғашқыда жүк көліктерінің кіруіне қарсы болып, кейін гуманитарлық керуендерді қорғауға жауапты жергілікті тайпалық құрылым өкілдеріне шабуыл жасаған. Атыс салдарынан 11 адам қаза тапқан.
Осыдан соң ғана Израиль көліктерге өтуге рұқсат берген, алайда керуендер қараусыз қалып, оларды қылмыстық топтар тонап әкеткен. Газа билігі бұл жағдайға Израиль әскерінің жанама түрде қатысы бар деп есептейді.
Сонымен қатар әуеден тасталған көмектің көлемі өте мардымсыз болғаны айтылды. «Бір жүк көлігінің жүгін де алмастырмайтын көмектер негізінен израильдік армия бақылайтын аудандар — Ат-Туффах пен Джебалияға тасталды. Бұл аудандарда қарапайым палестиналықтар тұра алмайды», — делінген хабарламада.
Гуманитарлық апат ушығып барады
Газа секторында аштық күн санап өршіп барады. Ауыз су мен дәрі-дәрмек жетіспейді, санитарлық жағдай мүшкіл. Жергілікті және халықаралық ұйымдар Израильді аштық пен шөлді соғыс қаруы ретінде қолданды деп айыптауда.
Мәліметтерге сүйенсек, 2,3 миллион тұрғынның шамамен 2 миллионы ішкі босқынға айналған. Көпшілігі бірнеше рет үйін тастап, шатырларда немесе мектептерде өмір сүріп жатыр. Бұл орындарда санитарлық жағдай жоқ, инфекциялық аурулар таралуда.
Израиль армиясы күніне бірнеше рет дәл осы босқындар шоғырланған орындарды, соның ішінде лагерьлер мен азаматтық нысандарды бомбалап жатыр.
2023 жылдың 7 қазанынан бері Газа секторындағы израильдік шабуылдардан 59 921 адам қаза тауып, 145 233 адам жараланған.