RUS
SMARTNEWS.KZ басылымының хабарлауынша, 30 шілдеде Павлодарда екі баласын бесінші қабаттан лақтырып, артынан өзі секірген әйелдің оқиғасы елді есеңгіреткен еді. Қазір олардың өмірі үшін дәрігерлер жан сала күресіп жатыр.
2024 жылы туған кішкентай баланың жүрегі оқиға болған күннің кешінде тоқтап қалған. Алайда дәрігерлердің жедел әрекетінің арқасында сәбиді аман алып қалу мүмкін болды. Ауыр жарақат пен ішкі қан кету салдарынан бүлдіршіннің зақымдалған сол жақ бүйрегін алып тастауға тура келген.
«Баланың жағдайы өте ауыр, тұрақсыз. Жасанды тыныс алу аппаратына қосылған. Гемодинамикалық көрсеткіштер вазопрессорлар арқылы ұсталып тұр», – деді Павлодар облыстық балалар ауруханасының реаниматолог дәрігері Мерхат Әміренов.
Ал 2017 жылы туған екінші баланың жағдайы сәл жақсырақ – ауыр болса да, тұрақты.
«Санасы ояу, өзі тыныс алып жатыр», – деп хабарлады аурухана дәрігерлері.
Балалардың анасы да ауыр жарақат алған. Дәрігерлер оның да жағдайын «ауыр, бірақ тұрақты» деп бағалап отыр.
Еске салайық, 30 шілдеде Павлодарда әйел екі баласын көпқабатты үйдің бесінші қабатынан лақтырып жіберіп, артынан өзі де секірген болатын. Үшеуі де үйдің шатырындағы қалқаға құлап, аман қалған. Қазір аталған оқиға бойынша «Адам өлтіруге оқталу» және «Өз-өзіне қол жұмсауға итермелеу» баптары бойынша қылмыстық іс қозғалды.