RUS
SMARTNEWS.KZ басылымының хабарлауынша, АҚШ президенті Дональд Трамп Орталық Азия елдерін, соның ішінде Қазақстанды, Израиль мен мұсылман елдері арасындағы «Авраам келісімдеріне» қосуға ниетті. Бұл туралы Reuters агенттігі жазды.
Ақ үй жаңа мемлекеттерді аталмыш дипломатиялық бастамаға тарту мәселесін белсенді түрде талқылап жатыр. Қазіргі таңда алғашқы үміткер ретінде Әзербайжан қарастырылып отыр. Айта кетейік, «Авраам келісімдері» алғаш рет Трамптың алғашқы президенттік мерзімі кезінде, 2020–2021 жылдары басталған. Ол кезде төрт ислам мемлекеті АҚШ-тың делдалдығымен Израильмен қарым-қатынасын қалыпқа келтіруге келіскен еді.
Reuters мәліметінше, Орталық Азия елдерінің Израильмен сауда және дипломатиялық байланыстары бұрыннан бар. Сондықтан бұл бастама, негізінен, Сауд Арабиясына саяси қысым жасауға бағытталған символдық қадам болуы мүмкін.
«Бұл шеңберде әзербайжандық лауазымды тұлғалар Орталық Азиядағы әріптестерімен, соның ішінде Қазақстанмен, Авраам келісімдерін кеңейтуге қызығушылық бар-жоғын білу үшін байланысқа шыққан. Бірақ нақты қай елдермен сөйлескені әзірге белгісіз», — делінген агенттік таратқан ақпаратта.
АҚШ Мемлекеттік департаменті қай елдерді келісімге қосуды жоспарлап отырғанын ашып айтпады. Алайда, Трамп әкімшілігі үшін «Авраам келісімдерін» кеңейту сыртқы саясаттағы басым бағыттардың бірі екенін растады.