RUS
SMARTNEWS.KZ басылымының хабарлауынша, Павлодарда аурухана палатасында жатқан, екі баласын бесінші қабаттан лақтырып жіберген әйелді тәулік бойы полиция күзетіп отыр. Бұл ақпаратты Павлодар облыстық полиция департаментінің тергеу басқармасы растады.
Тергеу басқармасы бастығының міндетін атқарушы Абзал Ыбраевтың айтуынша, әйелдің денсаулығының ауырлығына байланысты оған бұлтартпау шарасы қолданылмаған — науқас өздігінен жүре алмайды.
Белгілі болғандай, 2024 жылы ол өзін-өзі өлтіруге әрекеттеніп, балконнан секірген. Сол кезде қылмыстық іс қылмыс құрамының болмауына байланысты тоқтатылған.
Павлодардағы №1 қалалық ауруханада 7 тамыз күні әйелге екі өкше сүйегіне остеосинтез жасау операциясы жасалғаны хабарланды. Дәрігерлер оның жағдайын тұрақты деп бағалап отыр.
Ал жамбасы сынған үлкен ұлы облыстық балалар ауруханасында ем қабылдауда, жағдайы біртіндеп жақсарып келеді. Балаға отбасы мүшесі қарап жатыр.
Еске салсақ, оқиға 30 шілдеде болған. Әйел 1,5 және 7 жастағы екі ұлын бесінші қабаттан лақтырып, артынан өзі секірген. Үшеуі де бірінші қабаттың қалың қақпасына құлаған. Екі күннен кейін кенже бала ауруханада көз жұмды.
Қазіргі таңда «Адам өлтіруге оқталу» және «Өзін-өзі өлтіруге дейін жеткізу» баптары бойынша қылмыстық істер қозғалған. Алдын ала мәліметке сәйкес, әйел арнайы медициналық мекемеде есепте тұр.