RUS
SMARTNEWS.KZ басылымының хабарлауынша, Шымкент қаласы әкімінің орынбасары Руслан Берденовке жасалған қастандық ісі бойынша сот тыңдалымы жалғасып жатыр. Бүгінгі отырысқа жәбірленуші онлайн қатысып, оқиғаның қалай болғанын айтып берді. Бұл туралы Kazinform жазды.
Берденовтің сөзінше, шабуыл жасаушы оған тура басынан оқ атуға тырысқан.
«Алғашқы оқ тура басыма бағытталды. Бұғып үлгердім. Артымнан төрт рет оқ атылды. Жерге құладым. Қасыма келіп, тағы да мылтығын оқтап жатты. Қансырап жаттым, бірақ орнымнан тұрмасам, өлетінімді білдім», – деді ол.
Оның айтуынша, қастандық жасаған Ернар Жиембаймен алысып үлгерген. Сол сәтте әкім орынбасарының жүргізушісі көлігімен қылмыскерге тосқауыл болған.
Жаралы шенеунікке жанында болған екі қыз алғашқы медициналық көмек көрсеткен. Олардың бірі – медбике.
«Ота кезінде өкпемнің 20 пайызы алынды. Бауырымды шашып, қайта жинады», – деп еске алды Берденов.
Сондай-ақ ол қарулы адамды бастапқыда танымаса да, кейін оның Ернар Жиембай екенін білгенін айтты.
Сот процесі әлі де жалғасып жатыр.