RUS
SMARTNEWS.KZ басылымының хабарлауынша, Атырау тұрғындары еліміз ішінде әуе қатынасына қойылған шарықтаған бағаларға шағымдануда. Бұл туралы Atyrau Oil Telegram-арнасы жазды.
Мәселен, 18 тамызда Атыраудан Астанаға ұшатын билет құны 127-139 мың теңге аралығында болған. Кейбір күндері баға одан да жоғары көтерілген. Оның үстіне бірқатар рейс қосымша ауысып мінуді талап етеді, бұл жолдың уақытын ұзартады.
«Мұндай жағдай жолаушылардың наразылығын күшейтіп отыр. Тек тікелей рейстер ғана бар, бірақ олардың саны шектеулі әрі бағасы тым қымбат», – делінген хабарламада.
Жергілікті тұрғындар мұндай қымбатшылық әсіресе жазғы маусымда, демалыс уақыты мен студенттердің Алматы немесе Астанаға оқуына бару кезінде үлкен қиындық туғызатынын айтады.
Әлеуметтік желілерде атыраулықтар еліміздің ішінде ұшқаннан көрші елдерге шыққан арзанырақ екенін айтып, ашуға булығуда.
«Халық билік пен әуе компанияларының назарын осы мәселеге аударуды талап етеді. Өйткені өңірдің көлікке қолжетімділігі тікелей халықтың тұрмыс сапасына әсер етеді», – деп жазды Telegram-арна әкімшілігі.
