8 қыркүйекте Қазақстанның бірқатар өңірінде дауыл, бұршақ және өрт қаупі күтіледі

SMARTNEWS.KZ басылымының хабарлауынша, «Қазгидромет» 8 қыркүйекке арналған дауылды ескерту жариялады.

Түркістан облысында таңертең және күндіз шаңды дауыл тұрады. Желдің екпіні 15–20 м/с дейін жетуі мүмкін. Өңірде төтенше өрт қаупі сақталады.

Ұлытау облысында найзағай күтіліп, шығысы мен оңтүстігінде дауыл соғады. Жезқазғанда да найзағай болады.

Қарағанды облысының батысы, солтүстігі мен шығысында найзағаймен қоса шквал өтеді. Облыстың бірқатар аумағында өрт қаупі жоғары.

Астанада бұршақ пен дауыл ықтимал. Күндіз жел екпіні 20 м/с-қа дейін жетеді. Өрт қаупі жоғары болып қалады.

Ақмола облысында қатты жаңбыр жауып, бұршақ пен дауыл болуы мүмкін. Түнде тұман түседі. Жел екпіні 23 м/с-қа дейін күшейеді.

Абай мен Шығыс Қазақстан облыстарында да бұршақ, найзағай, дауыл күтіледі. Кей өңірлерде желдің жылдамдығы 28 м/с-қа дейін барады.

Қызылорда облысында шаңды дауыл болжанса, Ақтөбе облысының оңтүстігі мен шығысында найзағай болады. Екі өңірде де төтенше өрт қаупі сақталады.

Алматы, Жамбыл, Жетісу облыстарының таулы аймақтарында найзағай соғады. Жамбылда және Маңғыстауда өрт қаупі ерекше деңгейде.

Павлодар мен Қостанай облыстарында да найзағай күтіледі, кей жерлерде бұршақ жаууы ықтимал.

Солтүстік Қазақстан облысында күндіз найзағай, түнде тұман болады.

Атырау облысының басым бөлігінде төтенше өрт қаупі сақталып отыр.